[ata: foa'i]
By LALI STAFFPago Pago - AMERIKA SAMOA
MAUA AISA MA TUPE I SE ALII NA I TOTONU O SE TAAVALE NA TAOFIA E LEOLEO I LUGA O LE ALATELE
O le po o Tesema 30, 2024, na taofia ai e leoleo ia se pikiapu i Utulei, ona o le leotele o le pa’o o le taavale. E to’alua i la’ua na iai i totonu o le ta’avale, na aofia ai le alii avetaavale o Jack Filipo faapea ma lana pasese, o Jay Ah-Ching (David).
Ona sa le’i iai se laisene aveta’avale a le alii avetaavale o Filipo, na faapea ona aveina ai o ia i le ofisa a leoleo, mo le fa’aauauina o ana suesuega.
Ae o Ah-Ching, na ave foi i le ofisa a leoleo, ona ina ua faatonuina o ia e leoleo e oso mai i fafo ma le taavale, ma su’esu’eina lona tino ma lavalava mo ni a’upega, sa maua ai e leoleo ia se tama’i taga pea i’ila i totonu o le taga o lona ofuvae, na iai ni ‘straws’ ua mae’a ona tipitipiina, ae o lo’o tumu i le Aisa, faapea se paipa mata’eta’e (e masani ona fa’aaogaina i le ulaina o le Aisa), o lo’o afifi i se napekini.
Faapea ai ma se vaega tupe Amerika e $539.00. Na maua foi ia Ah-Ching ia se telefoni, o seisi pepa i’ila o iai se Aisa. Ina ua fesiligia e leoleo ia Ah-Ching e tusa ai ma mea sa maua i lona tagata, e le’i tali mai Ah-Ching.
Sa fa’ao’oina atu uma nei mea uma i le vaega a leoleo e mataituina vaega o fualaau faasaina (VNU) mo le faia o a latou su’esu’ega, lea sa mafai ona fa’amaonia ai ia le iai o le vaega o fualaau faasaina, o le Aisa, i totonu o ‘straws’ na tipitipi, o le paipa mata’eta’e faapea ma le ma’a Aisa lea na i totonu o taga pepa i’ila.
O moliaga na faia fa’asaga ia Ah-Ching, na aofia ai le Umia o vaega o fuala’au faasaina (Aisa) ma le moliaga o le Umia o vaega o fualaau faasaina (Aisa), ma se fa’amoemoega e fa’atau atu i isi.
O le moliaga o le umia faasolitulafono o fualaau faasaina, o se vaega o solitulafono mamafa, e mafai ona faafalepuipuiina ai i le va o le lima ma le 10 tausaga, po o se sala tupe e i le va o le $5,000 ma le $20,000; po o faasalaga uma e lua.
O le moliaga o le umia faasolitulafono o vaega o fualaau faasaina (Aisa) ma se faamoemoe e faatauina atu, o se vaega o solitulafono mamafa. Ma e mafai ona nofosala ai i le falepuipui i le va o le lima ma le 10 tausaga, po o se sala tupe e i le va o le $5,000 ma le $20,000; po o faasalaga uma e lua.
E $10,000 se vaegatupe na fa’atulagaina e tatalaina ai le ua molia mai i le falepuipui, e faatalitali ai lona faamasinoga.
MAUA SE ALII NA FA’AO’OLIMA I SEISI ALII INA UA SALALAU LE ATA I LUGA O ‘UPEGA TAFA’ILAGI
O le taeao o le aso 15 o Fepuari, 2025, na valaau atu ai se tamaitai i le ofisa a leoleo, e ripotia le sauaina o lona uso e se alii ma sa tu’uina e lenei tamaitai i luga o ‘upega tafa’ilagi ia le ata vitio o le taimi sa sauaina ai lona tuagane, ma le faamoemoe e maua ai le na molia.
Ae e le’i valaau e lenei tamaitai ia leoleo, sa ia muamua valaau i le vaega a le EMS mo se fesoasoani i manu’a o lona tuagane. Sa faapea ona taunu’u atu le vaega a le EMS a’o talanoa le tamaitai ma leoleo, ma aveina lona tuagane i le falema’i mo togafitiga o ona manu’a.
Ina ua fa’atalanoaina e leoleo ia le tuafafine a le na a’afia, sa ia ta’ua e faapea, a’o ia aga’i atu i le fale, sa ia va’aia le faatumulia o luma o le fale ta lavalava i Fagaima ma ia afe ai loa e va’ai po o le a le mea o tupu. Sa ia va’aia le alii na afaina ma o iina fa’ato’a malamalama ai, o lona tuagane lea na a’afia.
Na ta’ua e le tamaitai i leoleo lona mauaina o le ata vitio mai i le fale ta lavalava, i le taimi sa sauaina ai lona tuagane, ma ia tu’uina loa i luga o upega tafa’ilagi, ina ia maua mai ai se fesoasoani, i le sailiga o le tagata na fasia lona tuagane.
Sa mafai ona matamata ai foi leoleo i le ata vitio ma o latou suesueina tagata o le nu’u ma fa’amaonia ai le alii 19 tausaga, o Robert Tuna, e nofo i Kokoland. Na mafai ona maua atu e leoleo ia le na molia, i lona aiga, ma aveina atu ai loa o ia i le ofisa a leoleo mo le faia o suesuega.
I le fa’atalanoaina o le na molia, sa ia fa’amaonia lona fa’ao’oina o ni manu’a i le na a’afia ma sa fa’atalanoaina foi e leoleo ia se molimau (le uso a le na molia), ma na fa’amaonia e le molimau ia le sauaina e lona uso o le na a’afia.
Na faapea loa ona lokaina le na molia, i le to’ese i Tafuna, e faatalitali ai lona faamasinoga.
O moliaga, o le alii 19 tausaga na molia, na aofia ai le Fa’ao’olima i lona tulaga e lua, o se vaega ‘D’ i solitulafono mamafa, e mafai ona nofosala ai i le lima tausaga, po o se sala tupe; po o faasalaga uma e lua.
O le moliaga lona lua, o le Faatupu vevesi i nofoaga faitele, o se vaega ‘B’ i solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.
Section: Le Lali
View the discussion thread.