O se vaaiga i le ulua’i pasi a’oga eletise a Amerika Samoa, ua to’ai taunuu mai mo le ofisa o aoga a le malo.
[ata foa’i]
By LALI STAFFPago Pago - AMERIKA SAMOA
O le vaiaso ua tuanai, sa faapea ona amata ai ona femalagai le ulua’i pasi aoga eletise a le teritori, o le amataga lea o se taulaiga mamao mo le teritori, e pei ona fa’alauiloa mai i se fa’aaliga fa’alauaitele a le Faigamalo o Amerika Samoa.
Ua fa’alauiloa mai i lenei fa’aaliga le taula’i o le Ofisa o A’oa’oga a Amerika Samoa, ina ia toe fa’aopoopo mai ma nisi pasi eletise, i tausaga o i luma pe a fa’amanuiaina taumafaiga e o gatasi ma avanoa mai i le malo feterale.
E tusa ai ma se fa’asoa mai ia i latou na galulue malosi ina ia mafai ona tino mai lenei fa’amoemoe, sa ta’ua ai e le susuga ia Erik Solderholm, le lua tausaga, a’o pesi le koviti, o latou galulue i le fausiaina o le ‘auivi o lenei pasi fou.
E fa tausaga o finau Solderholm ma lana kamupani mo se polokalama e mafai ona fa’aaogaina ai pasi a’oga e saogalemu mo le siosiomaga (EPA’s Clean School Bus Program). Ae o lea ua tini faamoemoe, ina ua mafai ona ia toe taliu mai i Amerika Samoa ma se pasi, aua la latou galulue so’otau’au ma le faigamalo tuai faapea taitai o le ofisa o a’oga, ina ia mafai ona maua e fanau a’oga lenei fa’amanuiga, o se pasi a’oga e alu i le eletise.
Sa saunoa le faletua ia Gabby Soderholm, o lenei pasi, o se avanoa lelei lenei, ua tauala mai i le polokalama a le EPA mo ni pasi a’oga e aoga ma puipuia ai le siosiomaga. Ma e ata mai ai foi le latou misiona, o le inivesi i nisi o auala femalagai maloloina, saogalemu ma sili atu ona lelei, mo fanau aoga.
O lenei pasi, e leai se kasa leaga e sau mai ai ma e leai se manogi kiso e mafai ona ta’ai ai fanau aoga, i taimi e faimalaga ai i totonu. E le gata foi i lea, e tau le lagona le afi o le pasi ma e fa’aitiitia ai le pa’o leotele i luga o ala tele.
Ua mae’a ona fa’ata’ita’i le pasi i luga o le auala ma ua mafai ona molimauina le tulaga lelei i femalagaiga i luga o auala a le teritori, ae le gata i lea, o tulaga i le kesi e faaaoga, aemaise lava i faigamalaga i luga o mauga, aemaise lava i le agai atu lea i le Falelima i Sasa’e.
Sa faamatalaina e Gabby Soderholm, o taimi ia e alu ai agai i luga o a’ega ia le pasi, e fa’aaoga e le pasi ia le enetia, ae a agai mai i lalo, ona fa’asaoina lea e le pasi ia le enetia. Ma e mafai ona fa’atelegese le alu o le pasi, e aunoa ma le o’omia o se vae taofi, e ala lea, i le ave’esea o le vae a le avepasi mai i le ‘accelerator’. O lea gaioiga e toe fafaga ai le ma’a, ma faapea ona tele se taimi e taofiofi ai e le avepasi ia le pasi.
E to’alua ni avepasi a le Ofisa o Aoga, o iai nei, ua agava’a pe ua pasia e la te fa’afoeina ia lenei pasi fou. O susuga ia ia Eric Brown ma Vili Loto. Sa ta’ua e Brown e faapea, e le gata o le ulua’i pasi eletise lenei a Amerika Samoa, ae o le ulua’i taimi lea ua iai se nofoaga e fafaga ai se taavale eletise i totonu o le teritori.
O le amataga o lenei masina sa faapea ona malaga mai ai ni sui mai i Arizona, mo le faia o ni a’o’aoga aveta’avale mo ave pasi a le teritori. Ma e tolu aso sa faataunu’uina ai lenei aoaoga, i vaega uma mo le fa’afoeina ma le tausiga o nei pisi.
Section: Le Lali
View the discussion thread.