[ata: foa'i]
By LALI STAFFPago Pago - AMERIKA SAMOA
LOKA SE TAMALOA I LE SAUAINA O LONA TO’ALUA ONA SA UO MA LE DJ A SE FALEKALAPU
I fa’amaumauga a le faamasinoga, o lo’o ta’ua ai le o’o mai o se vala’au i le Ofisa a Leoleo i le tu lua o po ma ao ia Aperla 18, 2025 ma ripotia mai ai le va’aia o se tamaloa o sauaina se fafine, i totonu o se ta’avale.
Sa ta’ua e le na valaau atu i le ofisa a leoleo le numera o le laisene a le taavale ma le faia e le ta’avale o se ‘U-turn’ i luma o le PX.
[Ua faapea ona le lomia suafa o i latou na a’afia i lenei fa’alavelave, aua le puipuiga o fanau iti.]
Na faapea loa ona aga’i atu leoleo i le nofoaga sa fa’asino atu iai e le na valaau atu i le ofisa a leoleo, ma ina ua latalata atu le ta’avale a leoleo i le McDonald’s, sa va’aia le ta’avale sa ta’ua i le ripoti, o agai atu i le itu i matu.
Sa faapea ona maua atu e leoleo le ta’avale i leisi itu auala o le fale teu oloa a le Bowling Alley, na taofia ai loa i luma tonu o se fale faatali pasi.
Na faapea ona agai atu le tasi leoleo i le itu a le aveta’avale, ae savali atu leisi i le itu o le pasese.
Ma sa momlimauina e leoleo ia le lavatoto o foliga o le tino sa nofo mai i le itu pasese ma le manu’a o lona mata tauagavale.
Sa fa’atonuina e leoleo ia le tina na a’afia, ina ia oso mai i fafo o le ta’avale ina ia mafai ona aveina atu o ia i le ofisa leoleo i Tafuna, mo le togafitia o ona manu’a. Ae o le aveta’avale (po o le na molia) sa faapea ona ave faapagotaina o ia.
Na faapea foi ona oso se tasi o sui malu o le malo i totonu o le taavale a le ulugalii, ma aveina atu i le ofisa a leoleo, e taofia ai a’o fa’ataunu’uina su’esu’ega a leoleo.
E tusa ai ma molimau a leoleo, sa lagonaina le malosi o le manogi pia o le na molia ma sa mafai ona fa’amaonia ia su’esu’ega masani sa faia e leoleo.
Ina ua mae’a ona togafitia e leoleo ia le tina na a’afia, sa faapea loa ona fa’atalanoaina o ia, ma sa ia faamatalaina e faapea, o latou ma le la fanau e to’afa, na fa’ato’a ona taunu’u atu i le teritori, mai i Seattle, i le po o le aso Lua.
Ae o le po o le aso Tofi, sa ia tapenaina ai se la tafaoga ma lona to’alua, i se falekalapu. Ma sa faapea ona o la aveina le la fanau e tu’u i le fale o lona tua’a, ae o la aga’i atu mo le la tafaoga i lea afiafi.
Ma na ta’ua e le tina na a’afia, le sologa lelei o mea uma i lea afiafi, ae peitai, na o’o loa ina o la talanoa i taimi ua tuana’I, sa faapea loa ona su’esu’eina o ia e lona to’alua e tusa ai ma lona olaga tuputupu a’e.
Sa ta’ua e le tina na a’afia le tupu so’o o lea tulaga, i lo la va ma lona toalua, e o’o lava ina fasi ai o ia e lona to’alua.
Na fa’amatala atili e le tina na a’afia e faapea, na valaau atu lona tina i lea afiafi, pe mafai ona o la toe fo’i atu i le fale, ae ina ua o la taunu’u i le la taavale, o i’ina na amata ai loa ona tatu’i ona foliga e lona to’alua.
Ma fa’aauau ai lava le sauaga o ia, i totonu o le taavale, ma a’o alu le ta’avale, lea na toto ai lona isu ma ta’e ai lona nifo. Sa ta’ua e le tina na a’afia ia lona le manatua pe na fa’afia ona tatu’i o ia e le ua molia.
Ae i le faamatalaga a le ua molia, sa o la o ma lona to’alua e tafafao, ae ona va’aia ai le DJ sa i le falekalapu, o le alii lea sa uo muamua ma lona to’alua, i vaitaimi o a’o’oga. Sa fa’amaonia e le na molia, sa lotoleaga ina ua malamalama i le so’otaga a lona to’alua ma le alii sa la fa’auo muamua.
O lea na ia fa’atonuina ai lona to’alua (le tina na a’afia) e la te o. Ma sa fa’amaonia e le na molia lona sauaina o lona to’alua ma ua salamo i lana gaioiga sa faia.
O moliaga na faia faasaga i le na molia, na aofia ai le Fa’ao’olima i lona tulaga e tolu, o le Faatupu Vevesi i nofoaga faitele ma le Faafoeina o se ta’avale, a’o fa’asuaava.
O moliaga o le fa’ao’olima ma le fa’afoeina o se ta’avale a’o fa’asuaava, o ni vaega ‘A’ i solitulafono mama, e mafai ona nofosala ai i le falepuipui, i le ta’i tasi tausaga, po o se sala tupe e ta’i $1,000; po o faasalaga uma e lua.
O le moliaga o le fa’atupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.
E $3,000 se vaegatupe na fa’atulagaina e mafai ona tatalaina ai le na molia, mai i le falepuipui, e fa’atalitali ai lona fa’amasinoga.
MISA SE ULUGALII I LUMA O LE LA FANAU
O le 10:44 i le po o Aperila 20, 2025, na vala’au atu ai se tina i le Ofisa a Leoleo mo se fesoasoani, ona o se la misa ma lona to’alua, i luma o le la fanau.
E taunu’u atu leoleo, ua sola ‘ese le tamaloa mai i le fale, ae na toe maua lava ina ua fa’afeso’ota’i e lona lava tina ia leoleo, ma ave faapagotaina ai o ia.
E tusa ai ma fa’amaumauga a le faamasinoga, sa ta’ua e le tina na vala’au atu i le ofisa a leoleo mo se fesoasoani, le fa’atupu misa o lona to’alua i totonu o le latou aiga.
Sa faamatalaina e le tina na a’afia i leoleo e faapea, ua alu le vaiaso ma lea aso atoa, o tu’u palauvale atu lava lona to’alua, ia te ia ma le la fanau.
Ma i lea afiafi, sa momoe ai le na molia ma le la tamaititi e 4 tausaga le matua, a’o la ta’oto’oto ma le la pepe e 2 tausaga, i leisi moega. Ae ua fa’ate’ia o ia (le tina na a’afia), ina ua ‘e’e le na molia ma fai mai, ua tiga lona tua, ma palauvale.
Sa faapea loa ona tu i luga le na molia, ma savali atu i le moega o lo’o ta’oto’oto mai ai le tina na a’afia, ma le pepe 2 tausaga, ma fai atu ua tina lona papatua ma toe palauvale. Ona kiki lea e le na molia ia le moega, ae tau lana kiki i le pepe 2 tausaga.
Na faapea loa ona vala’au atu le tina i lana tama teine matua, e 10 tausaga, e sau e si’i atu le pepe.
Sa faapea loa ona tu i luga le tina na a’afia ma fufusu ma lona to’alua (le na molia). Ma sa ta’ua e le tina na a’afia, le taumafai o lona to’alua po o le na molia, e titina o ia, ae le mafai ona sa ia (tina) tago i le valusi ona foliga.
Na faapea ona ‘e’e le na molia, e le fefe i se tasi ma toe taumafai e titina le tina na a’afia, ae peitai, sa toe liliu mai le tina ma valusi ona taliga. Sa fa’aauau ona ‘e’e le na molia ma fai mai ua leaga ona foliga, ona o le tina na a’afia.
Sa ta’ua e le tina na a’afia, ia lona fa’atonuina o le na molia, e alu ‘ese ma le fale, ae musu. O le mafua’aga lea na ia vala’au ai loa i le 911 mo se fesoasoani, ona fa’ato’a sola ‘ese ai lea o le na molia.
O le vaveao o le aso na soso’o ai, sa o’o atu ai se vala’au i le Ofisa Leoleo i Leone, mai i le tina a le na molia, ma fa’ailoa atu ai le iai o le na molia, i lo latou fale. Ma sa fa’apea ona aga’i atu loa leoleo i le fale o matua a le na molia ma lokaina mai ai o ia ma agai atu i le ofisa a leoleo i Leone, mo le fa’aauauina o su’esu’ega a leoleo.
Ae peitai, sa musu le na molia e fai sana faamatalaga. O lea, na ave sa’o ai loa o ia i le to’ese i Tafuna ma lokaina ai, e faatalitali ai lona faamasinoga.
Ae o ona moliaga, na aofia ai le Fa’o’olima i lona tulaga e tolu, faapea ma le Faatupu Vevesi i totonu o lona aiga, Atoa ai ma le Faia o se gaioiga e ono a’afia ai le saogalemu o fanau iti.
O moliaga o le fa’ao’olima ma le moliaga o le faia o se gaioiga e ono a’afia ai le saogalemu o fanau iti, o ni vaega ‘D’ i solitulafono mamafa, e mafai ona nofosala ai i le falepuipui, i le ta’i lima tausaga, po o ni sala tupe e ta’i $5,000; po o faasalaga uma e lua.
O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.
E $5,000 se vaegatupe na fa’atulagaina e mafai ona tatalaina ai le na molia, mai i le falepuipui.
Section: Le Lali
View the discussion thread.