[ata: foa'i]
By LALI STAFFUtah - AMERIKA
O le afiafi o le aso To’ona’i na se’i mavae atu nei, Iuni 14, 2025, na tula’i mai ai se fa’alavelave fa’afuase’i i le taulaga i le ‘a’ai a Salt Lake, i le setete o Utah, i Amerika sa faapea ona fa’ate’ia ai tagatanu’u uma o Samoa na lua, o lo’o aumau ma papa ‘a’ao i lea setete, ina ua salalau le tala i se tasi o tama fanau lauiloa a le atunu’u, na tagatavaleina i luga o le alatele, a’o auai i se solo tete’e filemu, sa auai atu ai le to’atele o tagata o Utah.
O le susuaga ia Arthur Folasa Ah Loo, po o Afa Ah Loo, e pei ona lauiloa ai o ia i le to’atele o atunu’u, sa maliu ina ua osofaia e se alii e 24 tausaga le matua, ia tagata na auai i le solo tete’e.
E tusa ai ma se ripoti mai i le Utah News Dispatch, i se faamatalaga mai i le Taitai Leoleo a le a’ai o Salt Lake, le susuga ia Brian Redd, sa tupu le fa’alavelave, ina ua va’aia e ni alii se to’alua sa la’eiina ia ‘vests’ a i latou, sa gafa ma le tausia o le filemu i le taimi o le solo tete’e, ia le alii 24 tausaga, o Arturo Gamboa, ua savali ‘ese mai i le savaliga a tagata, ma aga’i i tua o se pa ma’a, ma se’i ifo i fafo ia se fana (rifle) ma amata ona sauna lana osofa’iga.
Sa ta’ua e Redd, ia le savali atu loa o alii e to’alua ia sa la’eiina ‘vests’ mo le tausia o le filemu i le taimi o le solo tete’e, ma fesiligia ia Gamboa. Ae peitai, sa na’o na si’i e Gamboa o lana fana ma tamo’e mai aga’i i tagata savavali.
Na faapea ona se’i e le to’atasi o alii e to’alua lea sa la’eiina ia ‘vests’ mo le puipuia o le filemu, ia lana fana ma faapa aga’i mai ia Gamboa. E fa’atolu ona fa’apa e lea alii ia lana fana ma lavea ai Gamboa, ae peitai, sa faapea ona lavea ai ma Afa i le tasi o pulufana.
Sa ta’ua foi i le ripoti a le Utah News, e ui i taumafaiga a vaega o le sWAT medics ma le vaega tinei mu a Salt Lake, e fa’asaoina le soifua o Afa, ae peitai, sa i’u ina maliu o ia, ina ua taunu’u i le falema’i.
Ma na ta’ua ai foi i ulua’i su’esu’ega a leoleo e faapea, o le tagata sa taumafai Gamboa e fana, o se tagata sa tu lata i autafa o Afa.
Sa fa’aauau pea su’esu’ega a leoleo i lenei fa’alavelave mata’utia i le aso ananafi, na aofia ai ma le su’esu’eina o alii e to’alua ia sa taumafai e taofi Gamboa ae ua i’u ina maliu ai Afa.
O Afa o se tagata ua lauiloa i le talenia, e le gata i la’ei ae faapea i fa’afiafiaga. Na amata mai lona soifuaga tautua i totonu o falea’oga. Ae i le tausaga e 2019 sa auai atu ai o ia i se tauvaga gaosi lavalava i luga o le televise (Project Runway Redemption) ma o iina sa faapea ona a’ave ai tala o lana taleni i le gaosia o la’ei faapea ma fa’afiafiaga.
O nisi o la’ei e lua sa ia gaosia, sa faapea ona fa’aaogaina i le tauvaga o le Tausala o le Lalolagi i le tausaga e 2015 i Sanya, i Saina.
O se taleni sa fa’apea ona fa’afaileleina mai i totonu o ana vasega i lana a’oga o le Kolisi a Pesega, i Apia Samoa.
E momoli atu fa’amaisega ma alofa’aga o lenei nusipepa i lona aiga aemaise i sona to’alua ia Laura ma si a la fanau iti e to’alua.
Section: Le Lali
View the discussion thread.