[ata: foa'i]
By LALI STAFFPago Pago - AMERIKA SAMOA
LE PASIA E LE MAOTA O SUI IA LE FAATONU O PAKA MA MALAETA’ALO A LE MALO
E ui ina sa ulua’i te’ena e le Maota o le Senate ia suafa Tapusalaia Maneafaiga, e avea ma Faatonu o le Matagaluega o Paka ma Malaeta’alo a le malo, ae peitai, o le aso Lulu o le vaiaso ua tuana’i, sa faapea ona pasia ai e afioga i Senatoa ia lona tofiga, faatasi ai ma sana fa’amaualaloga i tama o le atunu’u.
Ae peitai, i le iloiloga a le Maota o Sui i le aso Faraile ua mavae, sa le’i mafai ona ausia ai e Tapusalaia ia palota e 11, e mafai ai ona fa’amautuina lona tofiga i totonu o le kapeneta. Sa na’o le to’afitu Faipule na palota e pasia le tofiga a Tapusalaia, ae to’alima na tete’e.
Sa na’o le to’a 12 Faipule na auai atu i tauaofiaga a le Maota o Sui i lea aso. Ma ina ua mae’a ona faataunu’uina le palota mo Tapusalaia, na toe faatula’i e le susuga ia Fiu Johnny Saelua sa lafo ina ia toe palotaina lenei tofiga. Na pasia le lafo ma ua ta’atia atu nei lenei tofiga, mo lona palota lona lua.
LAPATA’IGA TAU I LE SOIFUA MALOLOINA MO TAGATA O AMERIKA SAMOA
O se lapataiga mai i le Ofisa o le Soifua Maloloina a Amerika Samoa, e tusa ai ma le a’afiaga o le teritori i le faama’i o le “Leptospirosis”, talu ai le tetele o timuga. O lenei fa’ama’i e mafua i feau vai (se’i tulou) a manu ua inifeti, e maua i totonu o vai ma palapala.
Ua fautuaina tagata o le atunu’u, ina ia alo’ese mai i le ta’a’alo i totonu o vai palapala, la’ei seevae e puipuia ai tino, atoa ai ma le fa’amamaina o suavai taumafa.
O auga o lenei fa’ama’i, e aofia ai le fiva maualuga, o tino gagase, o le ulu ma manava tiga, manava ta ta (se’i tulou) ma le tino samasama po o samasama o totonu o mata (jaundice).
O lo’o iai vaila’au e mafai ona fa’aaoga e fofoina ai lenei gasegase.
Ua fa’ailoa mai foi e le Ofisa o le Soifua Maloloina, auala e mafai ona alo’ese ai ma lenei fa’ama’I, e aofia ai le alo ‘ese ma tafega vai, po o vaitafe i le tetele o timuga, po o so’o se vai e ta’e’ele ai manu. O le fufulu mama o lima, so’o se taimi e tago ai i manu. Fa’amalu pe ta’ele pe a iai i nofoaga o iai manu, po o nofoaga ua a’afia i lenei faama’i.
Ua fautuaina foi le la’eiina o la’ei puipuia, e aofia ai totigi lima, o se’evae malo, ma so’o se la’ei puipuia, i taimi e tago ai i manu po o le galue i nofoaga o iai manu.
E le gata i lea, fa’atama’ia ia manu fetolofi, aua o leisi lea o auala e a’afia ai le soifua maloloina.
Ia faia tui puipuia o manu (aemaise ta’ifau), mo lenei fa’ama’i.
Ua fautuaina foi le fa’amama ma fusi so’o se manu’a o le tino.
O vai taumafa, ia fa’amamaina pe fa’apuna.
Ma ia nofo mataala ma aoaoina, i taimi o faimalaga ai.
FA’AMALOSIA IA LE FAATULAGAINA E FAIFA’ATO’AGA O LO’O SAPALAIA LE ‘SCHOOL LUNCH’ IA ASIASIGA A LE DOA
O se fa’amanatu mai ile Ofisa o Fa’ato’aga a Amerika Samoa (ASDOA) mo faifa’ato’aga uma, o lo’o sapalaia ia taumafa i le polokalama o taumafa a le Ofisa o Aoga (SLP), ina ia fa’atulagaina ia se aso e mafai ona ai a latou fa’ato’aga e le aufaigaluega a le DOA, aua le nofo tapenapena o le atunu’u, mo le toe amataina o aoga.
I se fa’aaliga lata mai, mai i le Ofisa o Aoga, ua fa’alauiloa mai ai, le le toe taliaina e le SLP o ni fua fa’ato’aga, mai i fa’atoaga, se’ia vagana ua ausia e fa’ato’aga ia vaega fa’atulagaina a le SLP. O lo’o aofia ai i le lisi o vaega fa’atulagaina, ia se Tusi Pasi (Certificate of Compliance-COC) faapea ai ma le fa’amae’aina o se vasega e aoao ai le fa’aaogaina o fetalaisa, mai i le DOA, o ni fa’aopoopoga fou ia mai i le Ofisa o le Soifua Maloloina, e agava’a ai ia fa’ato’aga, e maua a latou pemita soifua maloloina (health permit).
O nei asiasiga, e fa’amautu ai le mulimulita’i po o le usita’ia e fai fa’atoaga o tulafono fa’atulagaina, aua le puipuiga o le saogalemu lautele. E asia e le aufaigaluega a le DOA ia fa’ato’aga, ina ia o lo’o faamautuina ia tulaga o fua o fa’ato’aga, i le maloloina, o le mama o nofoaga o lo’o totoina ai, o le saogalemu o le fa’aaogaina ma le teuina o fetalaisa ma vailaau, o le taulimaina ma le teuina o fua o faatoaga.
Afai e le ausia e se fa’ato’aga ia vaega fa’atulagaina e le DOA, o le a faapea ona toe faia e le DOA a’oa’oga ma toe fa’asa’o tulaga uma e mana’omia, ona toe fa’akalena lea o seisi asiasiga, pe a mae’a ona toe fa’asa’o uma tulaga, e pei ona fautuauina ai faifa’ato’aga.
Afai ae pasia le asiasiga a le ofisa o fa’ato’aga, ona maua lea e le faifa’atoaga o le Tusi Pasi (CoC). O lenei tusi pasi e mo le tausaga atoa e fa’amaonia le ausia e le fa’ato’aga o tulafono uma a le Ofisa o Faatoaga.
O lo’o ua galulue malosi le ofisa o fa’ato’aga, e fa’afeso’ota’i ia faifa’ato’aga ua mae’a ona filifilia e sapalaia le SLP, ina ia mafai ona fa’atulagaina a latou asiasiga. Ae peitai, o lo’o u’una’ia malosi ia faifa’ato’aga ina ia taumafai malosi e fa’akalena a latou asiasiga ma le DOA, ina ia alo’ese mai i le faatuai ma a’afia ai lo latou agava’a e sapalaia taumafa mo le tausaga a’oga fou.
E pei ona sa saunoa ai le Faatonusili o le Ofisa o Faatoaga, le susuga ia Daniel Helsham, o le mulimuli i nei tulafono, e fa’amautu ai le puipuia o le soifua maloloina o tagata, aemaise fanau.
Mo le fa’atulagaina o le su’esu’ega a le Ofisa o Faatoaga, e mafai ona fa’afeso’ota’i le numera telefoni 699-9272. Ia tu’u iai le igoa atoa o le faatoaga, o le nu’u ma afioaga, o le tagata autu e fa’afeso’ota’I ma le lisi o fua fa’ato’aga mo le SLP.
E tatau foi ona iai se laisene pisinisi e fa’amaonia ai lea faatoaga ma lea faatoaga. Ma ia manatua, o fa’ato’aga e le mae’a ona asia, o le a le agava’a mo le SLP, se’ia mae’a ona fa’ataunu’uina vaega uma e pei ona fa’atulagaina.
Section: Le Lali
View the discussion thread.