Clifford Heyliger (AVP): “A bira tempo pa salario digno y accion concreto den mercado laboral”

Como Presidente di Comision Permanente di Labor di Parlamento di Aruba, parlamentario Clifford Heyliger a describi e reunion sosteni cu Minister di Labor, mr. Wendrick Cicilia, como un paso importante den e discusion nacional tocante e desafionan cu ta confronta trahadonan y dunadonan di trabou den mercado laboral local. Segun Heyliger, e encuentro a confirma cu tin un interes amplio y un sentido di urgencia creciente pa aborda e diferencia cu ainda ta existi entre e salario minimo y e costo real di bida na Aruba. Durante e reunion, un di e temanan principal a concentra riba e necesidad di sigui traha pa haci e salario minimo mas cerca di e nivel di bestaansminimum. Segun Heyliger, e discrepancia entre loke un empleado cu salario minimo ta gana y loke realmente ta necesario pa mantene un bida digno no ta algo nobo, sino un problema cu a persisti pa hopi aña. “Nos mester haci un escogencia como sociedad,” Heyliger a expresa. “Nos kier sigui acepta un situacion caminda hende cu ta traha fulltime no por cubri nan necesidadnan basico, of nos kier traha hunto pa logra un sistema mas husto y sostenibel pa nos trahadonan.” E parlamentario a reconoce cu cualkier adaptacion significativo di salario minimo mester wordo analiza cuidadosamente, tumando na cuenta e posibel impacto riba empresanan, particularmente negocio chikito y mediano. Sin embargo, el a enfatisa cu e bienestar di e trahado mester sigui ocupa un lugar central den e discusion. Segun Heyliger, e realidad cu hopi residente tin mester di dos trabou, y den algun caso hasta mas, pa por mantene nan mes y nan famia, ta un indicacion cla cu e modelo actual tin limitacionnan serio. El a señala cu inclusive trahadonan cu ta bin Aruba for di exterior frecuentemente ta depende di multiple fuente di ingreso pa logra sobrevivi. “Esaki no ta e tipo di sociedad cu nos kier laga atras pa futuro generacionnan. A bira tempo pa nos move for di palabra pa accion. Aruba ta bon den discuti problema, pero awor ta momento pa implementa solucionnan concreto”, el a declara. Heyliger tambe a subraya e importancia di reevalua e structura economico di Aruba. Mientras turismo ta sigui siendo e principal motor economico di pais, el a indica cu un gran parti di e vacaturanan crea den e sector ta keda caracterisa pa nivel salarial relativamente abou. “Nos mester sigui desaroya y atrae otro pilarnan economico cu por genera trabounan di balor agrega mas halto y cu ta ofrece oportunidadnan profesional y tecnico cu pago mas competitivo. Industria, tecnologia, innovacion y otro sector strategico por contribui significativamente na mehora e posicion economico di nos forsa laboral”, segun Heyliger. Ademas di e tema salarial, durante e reunion tambe a dedica atencion considerabel na e proceso di reorganisacion den Departamento di Progreso Laboral (DPL). E presidente di comision a reconoce cu e reorganisacion no a permiti cu tur aspectonan di e departamento wordo atendi completamente te awor, creando preocupacion legitimo entre empleadonan y stakeholdernan. Heyliger a indica cu e tema aki lo continua ocupa un luga prioritario den agenda di Comision di Labor. Segun dje, Minister Cicilia a expresa disposicion pa regresa Parlamento pa profundisa e dialogo y presenta informacion adicional cu permiti identifica y implementa medida concreto pa fortalece e funcionamento di DPL. “Nos ta aprecia e apertura di e minister pa mantene e dialogo cu Parlamento. Nos meta no ta solamente identifica problema, sino tambe yega na resultado concreto cu beneficio tanto trahado como dunado di trabou. Comision di Labor lo sigui monitor e desaroyonan aki di cerca y promoviendo accionnan cu contribui na un mercado laboral mas fuerte, mas husto y mas sostenibel pa Aruba,” Heyliger a conclui. The post Clifford Heyliger (AVP): “A bira tempo pa salario digno y accion concreto den mercado laboral” appeared first on 24ora - Prome Den Noticia.