Cana of core trankil e siman ’ki: Real Estate den Bario ta cambia su fechanan di mei pa 16 y 17 di juni

ID Realty Group a anuncia cu e dos edicionnan di su exitoso programa comunitario “Real Estate den Bario”, inicialmente programa pa e ultimo siman di mei, awor ta pasa pa luna di juni despues di considera diferente peticion for di residentenan cu ya a confirma nan participacion den e evento di canamento/coremento cu tin den transcurso di e siman aki, y a expresa nan interes di no perde e importante sesionnan informativo tocante Ley di Herencia. Segun directiva di ID Realty Group, a tuma e decision despues di scucha e reaccionnan positivo di comunidad y evalua e posibel impacto cu e evento deportivo tin riba mobilidad y acceso na diferente area di e isla. Como resultado, e proximo edicionnan di “Real Estate den Bario” lo tuma luga: ·         Diamars 16 di juni 2026 na MFA Santa Cruz  ·         Diaranson 17 di juni 2026 na MFA Savaneta  Tur dos sesion lo cuminsa pa 7:00 di anochi y lo dura te aproximadamente 9:00 di anochi. E tema central di e edicionnan aki ta Ley di Herencia, un asunto cu ta genera hopi pregunta den comunidad y cu regularmente ta impacta famianan durante momento importante di transicion y planificacion patrimonial. Durante e encuentro, participantenan lo ricibi informacion practico y orientacion tocante derecho hereditario, procedementonan legal relevante y aspectonan cu mester considera pa evita complicacionnan den futuro. Desde su lansamento, “Real Estate den Bario” a bira un plataforma valioso pa comparti informacion accesibel y relevante cu comunidad, cubriendo topiconan relaciona cu propiedad, inversion, legislacion, financiamiento y otro aspecto importante di mercado inmobiliario Arubano. ID Realty Group a expresa su gratitud pa e comprension y entusiasmo cu residentenan a demostra pa e iniciativa y ta invita tur persona interesa pa probecha e oportunidad di participa den un di e dos sesionnan. Pa mas informacion tocante e actividadnan of pa confirma participacion, interesado nan por sigui e pagina oficial di ID Realty Group riba social media. The post Cana of core trankil e siman ’ki: Real Estate den Bario ta cambia su fechanan di mei pa 16 y 17 di juni appeared first on 24ora - Prome Den Noticia.