Iberostar Aruba ta reforsa su compromiso pa reduci desperdicio di cuminda cu tecnologia di inteligencia artificial

JOIA Aruba by Iberostar ta sigui tuma pasonan importante pa proteha medio ambiente door di introduci tecnologia nobo den su cushinanan pa yuda reduci desperdicio di cuminda y mehora e practicanan di maneho di desperdicio na hotel. Desde april 2026, e hotel ta uzando un sistema di monitor desperdicio di cuminda uzando Inteligencia Artificial (AI) cu ta yuda e ekipo di cushina compronde miho cuanto cuminda ta wordo benta afo y cu por wordo reduci. E sistema ta funciona door di suministra e resto di cuminda cu ta den cushina y ta brinda informacion cu ta yuda e chefnan y e personal tuma decisionnan mas responsabel ora di prepara cuminda. Door di compronde cua cuminda ta wordo benta afo mas hopi, e hotel por mehora e planificacion y como resultado identifica medidanan pa reduci desperdicio pa asina opera na un manera mas responsabel y eficiente. Recientemente, Iberostar Hotels & Resorts a invita miembronan di prensa local na JOIA Aruba pa un presentacion special y demostra con e sistema ta funciona den e operacion diario. Durante e bishita, prensa tabata tin e oportunidad di siña mas over e esfuersonan di sostenibilidad di e compania y su meta a largo plaso pa elimina desperdicio cu ta bay dump, a traves di varios accion lidera pa su ekipo di 3R (Reduci, Re-uza, Recicla) kendenan ta traha den tur area di operacion pa midi, clasifica y desaroya maneranan pa reconsidera nan enfoke riba desperdicio.  E esfuersonan aki ta parti di un compromiso mas extenso di Iberostar cu sostenibilidad a traves di su movemento Iberostar Wave of Change, cu ta inclui un enfoke riba iniciativanan di economia circular, incluyendo prevencion di desperdicio na dump, reduccion di desperdicio pa medio di un consumo eficiente, y re-uzo di recurso ki ora cu ta posibel. Na aña 2025, e compania a reduci caba e desperdicio cu ta bay dump cu 80% (compara cu su base di aña 2021) y ta trahando den diferente destinacion pa haya diferente solucion localmente. Iberostar Hotels & Resorts ta kere cu accionnan chikito diario por crea un cambio significante cu tempo. Door di mehora e maneho di cuminda y reduci desperdicio, e hotel tin como obhetivo contribui na un modelo di turismo positivo na Aruba. “Na Iberostar, nos ta trahando pa continuamente reduci nos impacto den nos operacionnan di tur dia,” asina Arnaud Le Lanchon, Gerente General di Iberostar Aruba a declara. “Nos ta orguyoso di introduci solucionnan cu ta yuda nos reduci desperdicio, mehora eficiencia, y sigui cuida e bunita isla di Aruba.” Iberostar Hotels & Resorts ta sigi traha hunto cu empleadonan, huespednan, socionan y e comunidad local pa promove turismo responsabel y crea un impacto positivo pa futuro generacionnan. Tocante Iberostar Hotels & Resorts  Iberostar Hotels & Resorts ta e division di hotel y e curason di e negoshi di Iberostar Group, un multinacional spaño 100% propiedad di famia cu tin 70 aña di historia den turismo, cu su origen den negoshi cu ta data for di 1877. Su portfolio tin 33,500 camber den 100 hotel di cuater y cinco strea den 14 pais, dedica na brinda calidad excepcional y servicio di curason. Na mes momento, e ta mantene un modelo di turismo responsabel cu ta priorisa e bienestar di tanto hende como naturaleza. Duna bon bini na 2.5 miyon huesped pa aña y cu un presencia primario na canto di lama, e marca Iberostar Beachfront Resorts ta ofrece tres segmento distinto pa cumpli cu e deseonan di tur biahero. Iberostar Waves ta brinda experiencianan yen di diberticion, perfecto pa famia y parehanan cu ta stima e beach. Iberostar Selection ta ofrece estadianan premium, amplio y relahante cu servicio excepcional. Finalmente, JOIA by Iberostar ta un coleccion di resorts di luho den locacionnan exclusivo, distingui pa un servicio altamente personalisa y refina. *E portfolio di Iberostar Beachfront Resorts ta exclui su interesnan na Cuba. The post Iberostar Aruba ta reforsa su compromiso pa reduci desperdicio di cuminda cu tecnologia di inteligencia artificial appeared first on 24ora - Prome Den Noticia.