Prome Minister Mike Eman a bishita Koninklijk Huisarchief na Den Haag

Den cuadro di e bishita oficial di delegacion di Aruba na Hulanda, Prome Minister mr. Mike Eman, hunto cu Ministro Plenipotenciario mr. Mildred Schwengle y delegacion, a bishita diamars mainta e Koninklijk Huisarchief na Den Haag. Director di Koninklijke Verzamelingen na Den Haag, drs. Claudia Hörster, y director interino di Kabinet van de de Koning, drs. Frans Princen a ricibi e delegacion. E encuentro a enfoca riba e importancia di preserva y documenta patrimonio historico di Reino Hulandes, incluyendo e relacion historico profundo entre Aruba y e Casa Real Hulandes. Durante e bishita, e delegacion a haya un recorido den e archief, caminda a mustra diferente documentonan historico y potretnan di antaño hasta esnan relaciona cu Aruba. Un di e momentonan cu a yama particularmente atencion tabata e descubrimento di diferente potretnan y imagennan historico di Aruba cu ta data for di 1904. E material historico ey ta ofrece un bista unico riba con Aruba tabata wordo representa y documenta den e prome periodonan di siglo pasa. Prome Minister Mike Eman a expresa su aprecio pa e manera cu e archief ta preserva e memoria historico di Reino. The post Prome Minister Mike Eman a bishita Koninklijk Huisarchief na Den Haag appeared first on 24ora - Prome Den Noticia.