Prome Minister Mike Eman a bishita algun hoben studiante Arubiano na Hulanda

Mas di 30 studiante y hoben profesional Arubiano a participa den un encuentro special cu Prome Minister mr. Mike Eman na De Haagse Hogeschool na Den Haag. Durante e anochi, a intercambia pensamiento riba futuro di Aruba, e papel di hobenan den desaroyo di nos pais y diferente iniciativa cu Gobierno di Aruba ta desaroyando pa fortalece e conexion entre Aruba y talento Arubiano na exterior. E encuentro tabata caracterisa pa un ambiente ameno, interactivo y constructivo, caminda studiantenan a haya oportunidad pa comparti nan preocupacionnan, ambicionnan y vision tocante nan futuro profesional. Brian Koolman, studiante di Tourism Management na NHL Stenden, a describi e encuentro como “hopi interesante, interactivo y hasta humoristico.” Segun dje, e forma habri cu Prome Minister Mike Eman a comunica cu e studiantenan a haci e sesion sinti accesibel y relevante. Koolman a enfatisa cu e dialogo no solamente a trata e oportunidadnan, pero tambe e retonan cu hopi hoben ta enfrenta ora nan kier regresa Aruba despues di studia na Hulanda. Tambe Nathan Perez, studiante di Management & Organization na De Haagse Hogeschool, a expresa su aprecio p’e iniciativa. Perez a indica cu e encuentro a resulta hopi informativo y motivador pa studiantenan cu ainda ta considera nan futuro entre Hulanda y Aruba. Segun dje, e hecho cu Gobierno di Aruba ta presenta iniciativa concreto pa facilita e regreso di hoben profesionalnan ta contribui na crea mas confiansa pa considera un futuro na Aruba. Durante e encuentro, tambe a dialoga riba diferente proyecto strategico y oportunidadnan pa desaroya un economia di conocemento na Aruba, incluyendo cooperacion cu institucionnan educativo y oportunidadnan pa innovacion, investigacion y crecimiento profesional. Gobierno di Aruba ta considera e dialogo continuo cu e hobenan Arubiano na exterior como un paso importante pa fortalece e conexion cu e siguiente generacion di nos lidernan y profesionalnan cu lo contribui na futuro di Aruba.   The post Prome Minister Mike Eman a bishita algun hoben studiante Arubiano na Hulanda appeared first on Aruba Native.