Minister Croes: Cumbre ‘Women in ParaSports Americas Summit’ t’e base pa hende muhe bira lider den deporte

Recientemente, Gobierno di Aruba hunto cu Aruba Paralympic Committee (APC) conhuntamente cu Americas Paralympic Committee (AmPC) a organisa un exitoso edicion di e ‘Women in Para Sports Americas Summit’, cu a tuma luga na Aruba durante tres dia consecutivo. E cumbre aki a reuni mas di 50 hende muhe lider den region Panamericano, representando 29 pais, pa dialoga riba e topiconan clave relaciona cu inclusion, liderazgo y desaroyo den parasports. Durante e tres dianan, e enfoke principal tabata riba fortalece conexion, amplia e rednan y converti e ideanan na accion concreto, reconociendo cu liderazgo no ta construi individualmente, sino conhuntamente den un comunidad. Como Minister di Deporte, Minister Gerlien Croes a participa activamente den e panel titula “Leading Global Change: Advancing Women in Sports Across Systems”, unda hunto cu lidernan internacional manera Barbara Ortiz (United Nations), Alia Atkinson (campeon mundial y atleta olimpico), Shardea Croes (AmPC Women’s Committee) y Nicole Hoevertsz (International Olympic Committee), nos a discuti con por impulsa cambio real den sistema deportivo y fortalece participacion y liderazgo femenino na tur nivel. E prome dia a marca inicio di e combersacion- importante y conexionnan regional, mientras cu e di dos dia tabata caracterisa pa energia, intercambio di conocemento y creacion di e lasonan significativo entre e participante nan. Durante e cumbre di hende muhe den parasports, participantenan local y internacional a disfruta di un exhibicion interactivo cu diferente organisacion y fundacion cu ta brinda servicio na persona cu limitacion. Informacion, demostracion y inspiracion —hunto pa sigui promove inclusion y desaroyo den deporte. E dia final a representa un clausura inspirador, unda tur informacion ta converti na accion, cu enfoke riba liderazgo cu proposito, herment practico y un vision strategico pa sigui crea impacto den parasports for di cada rol cu e participantenan ta ocupa. E edicion aki a destaca su mes como un exito completo, no solamente pa su contenido y participacion internacional, sino tambe pa su enfoke innovador. Pa prome biaha, e cumbre a habri su porta pa participacion di comunidad, permitiendo intercambio directo di experencia entre profesionalnan, para-atletanan y publico. Tambe, pa prome biaha, a inclui participacion di hende homber den e dialogo, reflehando un enfoke inclusivo y integral, conforme vision di e organisacion. E presencia di figura internacional importante, manera representante di United Nations, Barbara Ortiz, y representante di International Paralympic Committee, Ojunoka Agudah, a agrega balor significativo na e nivel di e cumbre, posicionando Aruba como un referente pa futuro edicionnan un biaha mas. Gobierno di Aruba ta orguyoso di a contribui na realisacion di e evento aki, reafirmando su compromiso cu inclusion, igualdad di oportunidad y desaroyo di parasports. Minister Gerlien Croes a expresa su gradicimento na Aruba Paralympic Committee, Americas Paralympic Committee, tur partnernan y organisadonan, pa nan dedicacion, liderazgo y esfuerso continuo. E cumbre aki no solamente a fortalece e presencia di parasports, pero tambe a planta e base pa un futuro unda mas hende muhe lo lidera, inspira y crea cambio den deporte riba nivel local y internacional. Hunto ta sigui construi un movemento cu ta transforma bida y crea oportunidad pa tur. The post Minister Croes: Cumbre ‘Women in ParaSports Americas Summit’ t’e base pa hende muhe bira lider den deporte appeared first on 24ora - Prome Den Noticia.