Ta busca pa fortalece salud publico: Aruba lo ta anfitrion di e DucaPHEN Conference 2026

Aruba ta orguyoso di ta e pais anfitrion di e reunion 2026 di Dutch Caribbean Public Health Expertise Network (DuCaPHEN), reuniendo e lidernan di salud publico, e profesionalnan medico, partnernan regional y internacional for di Caribe Hulandes y Reino Hulandes. E evento di e aña aki ta organisa pa Aruba den colaboracion cu RIVM di Hulanda, demostrando e compromiso como parti pa fortalece cooperacion, preparacion, y resiliencia den salud publico den henter region. E conferencia lo tuma luga durante e proximo siman na Aruba. Lo ta reuniendo expertonan y partnernan den salud publico for di henter Caribe Hulandes. DuCaPHEN ta estableci pa fortalece cooperacion den salud publico, vigilancia di enfermedad, preparacion pa pandemia, promocion di salud, y contesta na emergencia entre Aruba y demas islanan cu ta forma parti di Reino Hulandes. E red regional aki ta sigui hunga un rol importante den intercambio di conocemento, coordinacion y desaroyo di sistemanan di salud publico mas conecta y resistente den region. E conferencia di e aña aki na Aruba lo conta cu participacion di representantenan di diferente organisacion di salud, instancianan gubernamental, institucionnan academico y expertonan di salud publico, kende lo participa den e discusionnan y intercambio di conocemento riba prioridadnan importante di salud. Temanan lo inclui prevencion di enfermedadnan contagioso, preparacion pa emergencia, control di vector, epidemiologia y fortalecemento di colaboracion entre nos islanan. Cu organisacion di DuCaPHEN 2026, Aruba ta reafirma su compromiso cu colaboracion regional, innovacion y progreso den salud publico, mientras cu ta fortalece e cooperacion entre nos islanan pa responde miho na retonan di salud cu nos region ta enfrenta awe y den futuro. Ta spera cu e conferencia aki lo promove cooperacion duradero, intercambio di experiencia, y e aliansanan strategico cu lo contribui na e comunidadnan mas saludabel y resiliente den henter Caribe Hulandes. The post Ta busca pa fortalece salud publico: Aruba lo ta anfitrion di e DucaPHEN Conference 2026 appeared first on 24ora - Prome Den Noticia.