Parlamentario Evelyn Wever-Croes: SIMAR TA PIDI ATENCION PA BIENESTAR DI DOCENTENAN

    ORANJESTAD – Den un reunion di Comision Fiho di Enseñansa den Parlamento, SIMAR a trece padilanti su preocupacionnan pa cu bienestar di docentenan. Na un forma hopi profesional y preocupa, presidente di sindicato a elabora riba desaroyonan den enseñansa cu mester haya atencion urgente. Lamentablemente e minister di enseñansa no ta dunando atencion na sindicato pa por traha na bienestar di docentenan.   Basa riba e informacion cu Parlamento a haya di SIMAR fraccion di MEP a entrega pregunta na minister di Enseñansa tocante e situacion preocupante rond di e negociacionnan pa fase 2 di restructuracion salarial di docentenan. Te awor a tuma luga solamente un reunion entre ministerio y sindicato SIMAR, mientras cu e otro reunionnan a wordo cancela. SIMAR mes a indica cu e contacto cu e minister actual ta minimo, y cu den pasado tabatin un contacto mas directo, rapido y efectivo cu e anterior minister di Enseñansa.    Fraccion di MEP ta cuestiona e falta di continuidad den e dialogo, considerando cu e tema ta hopi importante pa bienestar y motivacion di nos personal docente.   Den e carta Fraccion di MEP ta pidi claridad tocante: ⁠  ⁠e motibonan pa cancelacion di reunionnan; ⁠  ⁠e estado actual di e negociacionnan; ⁠  ⁠y con e minister ta pensa di reanuda y finalisa e proceso.   Conforme reglamento di Parlamento, e minister tin tres siman pa contesta e preguntanan. Pa Fraccion di MEP un dialogo serio y consistente cu sindicatonan ta esencial pa logra solucionnan duradero y pa duna nos docentenan e respet y reconocimiento cu nan merece. The post Parlamentario Evelyn Wever-Croes: SIMAR TA PIDI ATENCION PA BIENESTAR DI DOCENTENAN appeared first on Aruba Native.