Quota International of Aruba hunto cu Fundacion FEPOH ta haci donacion di e sistema di Redcat LightSpeed Classroom Audio na dies scol na Aruba

    Diahuebs, 28 di mei 2026, a tuma luga e entrega oficial di dies sistema di Redcat LightSpeed Classroom Audio durante un encuentro special den Sala Diamante na Biblioteca Nacional Aruba.   E donacion aki a wordo haci posibel door di Quota International of Aruba, cu anualmente ta organisa su fundraising durante temporada di carnaval cu benta di earplugs. Cu e fondonan aki a logra haci e donacion di dies sistema di audio moderno entre dies scol na Aruba.   E sistema Redcat LightSpeed Classroom Audio ta un sistema di sonido diseña specificamente pa mehora comunicacion den klas. E ta yuda maestronan amplifica nan bos miho den klas, promoviendo concentracion, comprension y participacion di e alumnonan.   Durante e encuentro, a duna tambe un breve splicacion tocante e uzo y e importancia di e sistema den enseñansa moderno. E cabesante y team di e scolnan a ricibi e equipo y e contrato cu informacion necesario.   E experiencia na St. Paulus School, caminda e sistema aki ta den uzo pa tres aña caba, a mustra resultadonan hopi positivo. E scol a nota cu e resultado di e alumnonan a subi y alabes a mehora e participacion di alumnonan den klas. Segun e scol, e sistema ta contribui na un ambiente di enseñansa mas efectivo y interactivo.   E siguiente scolnan cu a ricibi e sistema di Redcat LightSpeed Classroom Audio ta:   Rosario College St. Rosa College St. Dominicus College Mon Plaisir Basisschool Prinses Amalia Basisschool St. Franciscus College Colegio Bon Bini  St. Aloysius School Colegio Felipe B. Tromp  St. Anna School   Cu e iniciativa aki, Quota International of Aruba hunto cu Fundacion FEPOH ta sigui traha hunto pa fortalese calidad di enseñansa y crea un ambiente mas inclusivo pa tur mucha na Aruba. The post Quota International of Aruba hunto cu Fundacion FEPOH ta haci donacion di e sistema di Redcat LightSpeed Classroom Audio na dies scol na Aruba appeared first on Aruba Native.