Partido MEP ta bisa NO na HOFA: A entrega carta di malcontento na VNO

Partido MEP a dal nan siguiente paso den e campaña pa logra para introduccion di e Ley di Consenso HOFA (Houdbare Overheid Financien Aruba). A organisa un caminata di protesta cu nan grupo di simpatisante pa yega te na e oficina di representacion di Hulanda na Aruba (VNO) pa entrega un carta. E grupo di alrededor di 200 persona tabata compaña pa e.o. lider di partido MEP mr. Evelyn Wever-Croes. E politico a bisa cu nan a cuminsa cu e campaña desde cu gobierno aña pasa a bisa cu nan lo bay di acuerdo cu HOFA. Pero loke cu a hala nan atencion e siman aki tabata e expresionnan peligroso di Secretario di Estado Eic van den Burg. E expresionnan di e politico Hulandes a trece hopi rabia y indignacion den comunidad. Nan ta haya cu na un forma hopi sarcastico e Secretario di Estado a papia di e structura estatal bisando cu “Aruba tabatin un sorto di Status Aparte”. E expresion aki, e lider di MEP ta sinti, por bini di un studiante pero no di un politico cu mester sa historia di e paisnan aki banda. Y hustamente e funcionario cu tin di atende cu e asuntonan di e islanan Hulandes den Caribe. “Mi no ta kere cu e tabata un “slip of the tongue”. Mi ta kere e ta loke cu nan ta sinti realmente.” E Status Aparte, Wever-Croes ta bisa, tabata e yabi pa Aruba su progreso y bienestar. Awo e politico ta kere cu mester cuminsa na exigi respet for di e Secretario di Estado van der Burg, pa e structura estatal di Aruba (a pone esaki den e carta tambe). Tambe ta pidi pa e politico disculpa su mes p’e forma con el a papia di Aruba. Loke ta molestia MEP tambe di e Secretario di Estado ta e cu kier mina e derechonan adkiri di Aruba. Esaki pasobra el a papia cu Corsou y Sint Maarten a haya nan posicion separa y a haya Ley di Reino. Pero cu Aruba a sali di e constelacion hopi mas prome y awo kier pone Aruba den e mesun posicion cu e dos islanan menciona. E ta nifica mina autonomia, segun Wever-Croes. “Ta prome biaha ta scucha un mandatario Hulandes bisa cu esaki ta e motibo tras di e HOFA. “ Ademas, e politico a tuma nota di hopi rapport y nota di e otro dos islanan y cu ta indica cu nan no ta contento cu e situacion. VNO a informa MEP cu Secretario di Estado mes lo contesta nan y ta spera riba esaki pa mira cual ta e siguiente paso. Na Aruba lo sigui cu e discusionnan riba HOFA y ta spera cu esaki no tuma luga riba Facebook pero den parlamento . E ta kere cu den e organo aki mester sinta discuti e tema di HOFA. Hasta el a bisa cu e ta contra di HOFA pero si mayoria den parlamento ta na fabor di HOFA, despues di a informa nan mes bon riba e situacion, “anto e ora mi ta biba cu ne”. Dangui Oduber tabata presente den e manifestacion. E ta completamente contra HOFA pa e simpel motibo cu esaki ta kita derecho di Aruba como pais. HOFA ta torno na Status Aparte. E tambe a menciona cu e expresion di Secretario di Estado cu e intencion di HOFA no ta pa Aruba tin un finansa publico sostenibel pero pa pone Aruba den un situacion igual cu Corsou y Sint Maarten, cual paisnan tin un Ley di Reino. Si nan tin, mester impone riba Aruba tambe. Esey nan a sinti. A enfatisa cu Aruba no tin un posicion igual cu e otronan pasobra Aruba no tin un Ley di Supervision Financiero di Reino. Esun di Aruba ta regla den un ley local. “E intencion di Hulanda no ta pa yuda Aruba. Kier kita Aruba su Status Aparte y pone Aruba igual cu Corsou y Sint Maarten.” Si kier igualdad, e ta conseha pa Hulanda duna Sint Maarten y Corsou un posicion igual cu Aruba. Of si kier pa Aruba ta igual cu e otro dos islanan, anto duna Aruba un “kwijtschelding” manera Corsou y Sint Maarten a haya. E isla aki  nan kier duna un reduccion di 6.9 pa 3.4% y pa un prestamo causa y forsa door di pandemia.  The post Partido MEP ta bisa NO na HOFA: A entrega carta di malcontento na VNO appeared first on 24ora - Prome Den Noticia.