Otami Thomasia di AVP: A reuni cu Inspectie van het Onderwijs caminda enseñansa di calidad tabata central

Como Presidente di e Comision Permanente di Enseñansa den Parlamento di Aruba, parlamentario Otami Thomasia a presidi awe un reunion importante cu Inspectie van het Onderwijs, caminda a discuti e estado actual di nos sistema educativo, e prioridadnan pa futuro y e vision pa sigui fortalece calidad di enseñansa na Aruba. Durante e reunion, Inspectie van het Onderwijs a comparti informacion amplio tocante e trabounan di supervision y evaluacion cu ta realisa na scolnan, asina tambe e progreso cu ta haci den area di digitalisacion y mehoracion continuo di e sistema educativo. Segun Thomasia, un di e puntonan principal di e reunion tabata e pregunta fundamental: kico ta defini un bon calidad di enseñansa? Durante e discusion a enfatisa cu no por midi e calidad educativo solamente riba resultado academico of estadistica. Tambe ta importante cu cada mucha ta haya un ambiente sigur, sosten adecua y oportunidad pa desaroya nan potencial academico, emocional y social. Den e contexto ey, a papia extensivamente tocante e importancia di sigui midi y evalua calidad di enseñansa conforme e metanan y direccion estableci den e Plan Educativo Nacional 2030 (PEN 2030). E evaluacion continuo di nos sistema educativo ta esencial pa determina si nos muchanan realmente ta ricibi e instrumentonan necesario pa progresa y prepara pa futuro. Thomasia a enfatisa tambe e importancia di identifica y atende retonan den enseñansa na tempo. Segun e parlamentario di AVP, mester atende cu preocupacion y kehonan di forma eficiente y den un periodo rasonabel, pa asina scolnan, mayornan y principalmente muchanan por beneficia di e sosten necesario sin atraso innecesario. Otro tema cu a ricibi atencion special tabata e ubicacion adecua di muchanan den trayectonan educativo cu ta coresponde cu nan necesidadnan individual. Durante e reunion a comparti preocupacion pa ningun mucha keda largo sin acceso na e scol of programa cu miho ta adapta cu su desaroyo y capacidad. E rol di Bureau Leerplicht tambe a destaca como elemento esencial den e esfuerso colectivo pa percura cu tur mucha na Aruba ta participa activamente den enseñansa y no keda atras. A duna atencion particular na enseñansa di kleuter. Segun e informacion comparti, e proceso di doorlichting di kleuterschoolnan ta sigui y ta spera pa keda cla durante e periodo 2026–2027. Ademas, a anuncia e intencion pa presenta na 2028, pa prome biaha, un “Staat van de Kleuterscholen”, cu lo ofrece un panorama amplio di calidad, progreso y realidadnan den enseñansa di kleuter na Aruba. Tambe a discuti e necesidad di sigui revisa y evalua otro trayectonan similar den e diferente nivelnan di sistema di enseñanza pa percura cu nan ta sigui conecta cu necesidadnan actual di nos muchanan y cu e demanda di mercado laboral den futuro. “Nos muchanan merece e miho oportunidadnan pa logra exito. Pa logra esaki, nos mester sigui evalua, modernisa y fortalece nos sistema educativo constantemente. E reunion ta confirma cu calidad di enseñansa ta un responsabilidad comparti; y cu bienestar y desaroyo di nos muchanan mester sigui ocupa e lugar central den tur decision cu nos ta tuma,” Thomasia a declara. E Presidente di e Comision di Enseñansa a conclui enfatisando cu colaboracion entre Parlamento, Ministerio di Enseñansa, Inspectie van het Onderwijs, scolnan y comunidad lo sigui ta esencial pa keda construi un sistema educativo fuerte, inclusivo y prepara pa e generacionnan futuro. The post Otami Thomasia di AVP: A reuni cu Inspectie van het Onderwijs caminda enseñansa di calidad tabata central appeared first on 24ora - Prome Den Noticia.