FSHF dhuron 320 uniforma dhe 200 topa për fëmijët në Ukrainë

Federata Shqiptare e Futbollit i është bashkuar zyrtarisht iniciativës humanitare “Circle of Friendship”, e nisur nga Federata Ukrainase e Futbollit, duke dhuruar 320 uniforma dhe 200 topa futbolli për 20 shkolla dhe ekipe moshash në Ukrainë. Kjo nismë vjen në kuadër të fushatës së ndërmarrë nga Federata e Futbollit të Ukrainës për të mbështetur shkollat dhe ekipet amatore në të gjithë vendin, në një kohë kur, për shkak të luftës, sporti përballet me sfida të jashtëzakonshme infrastrukturore dhe financiare. Projekti “Circle of Friendship” synon të sigurojë pajisje bazë sportive për fëmijët, në mënyrë që ata të vazhdojnë të luajnë, të mësojnë dhe të rriten përmes futbollit, pavarësisht rrethanave të vështira. Përmes këtij kontributi, FSHF do të mbështesë drejtpërdrejt 20 shkolla dhe ekipe të moshave në Ukrainë, duke ofruar uniforma dhe topa, elementë thelbësorë për zhvillimin e stërvitjes dhe organizimin e aktiviteteve sportive. Pajisjet do të shpërndahen në kuadër të paketave të ndihmës që po koordinohen nga Federata Ukrainase e Futbollit, me synimin që të jenë gati për sezonin e ri futbollistik. Pavarësisht sfidave të mëdha të shkaktuara nga lufta, futbolli në Ukrainë vazhdon të shërbejë si burim rezistence, shprese dhe bashkimi për komunitetet lokale, veçanërisht për fëmijët. Duke iu përgjigjur kësaj thirrjeje solidariteti nga “Familja e Futbollit”, FSHF konfirmon përkushtimin e saj për të qenë pjesë aktive e nismave që promovojnë vlerat e sportit, solidaritetin dhe mbështetjen për fëmijët në nevojë. Përmes këtij gjesti konkret, Federata Shqiptare e Futbollit kontribuon në ruajtjen e të drejtës së fëmijëve për të luajtur futboll në kushte sa më dinjitoze. Përmes kësaj nisme, FSHF rikonfirmon se futbolli është më shumë se lojë. Është një urë solidariteti, një mjet shprese dhe një simbol bashkimi mes kombeve. The post FSHF dhuron 320 uniforma dhe 200 topa për fëmijët në Ukrainë appeared first on X-Media.