Stephany Sevinger (AVP): Modernisacion di KIA mester bay mucho mas leu cu solamente scanner

Parlamentario di AVP, Stephany Sevinger, a haci un apelacion durante e debate parlamentario tocante e situacion di e scannernan na KIA, pa mira e discusion den un contexto mucho mas amplio. Segun Sevinger, e cuestion di siguridad ta importante, pero e berdadero reto ta modernisa henter e sistema coreccional di Aruba. Como miembro di parlamento cu ta bishita KIA regularmente, Sevinger a indica cu su experiencia directo den e instituto a duna un perspectiva cu no tur hende tin. “Tur siman mi ta mira cu mi propio wowo con e edificio ta mustra señalnan di abandono, deterioro y falta di mantencion. Mi ta mira un infrastructura cu a surpasa su bida util y un personal cu, a pesar di e limitacionnan cu nan enfrenta, ta sigui cumpli cu nan deber cu hopi profesionalismo”, el a expresa. Sevinger a enfatisa cu e preocupacionnan di e trahadonan tocante siguridad ta totalmente legitimo y cu nan merece reconocemento pa e trabou dificil cu nan ta desempeña diariamente. Sin embargo, el a señala cu e scanner ta solamente un sintoma di un problema structural cu Aruba ta enfrenta pa hopi aña caba. Segun e parlamentario, e debate no por limita su mes na ekiponan di siguridad, mientras cu e realidad diario den KIA ta mustra otro desafionan serio, manera infrastructura deteriora, problema di higiene, falta di mantencion, instalacionnan sanitario cu no semper ta funciona manera mester y limitacion den facilidadnan pa rehabilitacion y desaroyo personal. “Un instituto coreccional ta kita un persona di su libertad, pero nunca mester kita un hende di su dignidad humano”, Sevinger a declara. Durante su intervencion, el a comparti tambe con e bishitanan regular na KIA a mustra e impacto humano cu detencion tin riba famianan. Segun Sevinger, regularmente e ta mira mayornan, casa y muchanan sali for di bishita emocionalmente afecta, un realidad cu ta recorda cu un condena no solamente afecta e detenido, sino tambe su famia y ambiente social. Paralelamente, Sevinger a expresa su preocupacion cu hopi detenido ta pasa gran parti di nan dia sin oportunidad suficiente pa sigui educacion, capacitacion of desaroya nan talento. El a relata cu durante su bishitanan el a encontra hopi persona cu tin talento extraordinario den artesania, trabou cu palo, pintura, reparacion y otro ofishi, pero cu hopi biaha no tin e oportunidad pa sigui desaroya e capacidadnan ey. “Nos ta gasta miyones di florin pa mantene personanan den detencion. Nos pueblo tin derecho di spera mas cu solamente castigo. Nos mester por logra rehabilitacion, capacitacion, educacion y preparacion pa reintegra exitosamente den sociedad”, Sevinger a afirma. Segun e parlamentario, rehabilitacion no solamente ta un cuestion humano, sino tambe un inversion den siguridad publico. El a indica cu cada persona cu sali di KIA sin guia, sin profesion y sin oportunidad, tin un riesgo mas grandi di bolbe bay den mal caminda, mientras cu cada ex-detenido cu sali cu un ofishi, diploma of perspectiva pa futuro ta fortalece siguridad den nos comunidad. P’esey, Sevinger a haci un apelacion na gobierno pa continua cu e trayectoria di modernisacion cu a cuminsa den colaboracion cu UNOPS y pa desaroya un vision integral pa KIA. Esaki, segun e, mester inclui inversion den infrastructura, mehoracion di e ambiente laboral pa trahadonan, fortalecemento di siguridad, ampliacion di programanan di rehabilitacion y garantia di condicionnan digno pa e detenidonan. “Awe mi kier tende no solamente con nos lo reemplasa un scanner, pero ki compromiso concreto tin pa sigui modernisa nos sistema coreccional. E manera cu un pais ta trata e personanan cu a faya ta bisa hopi tocante e tipo di sociedad cu nos kier construi”, Sevinger a conclui. The post Stephany Sevinger (AVP): Modernisacion di KIA mester bay mucho mas leu cu solamente scanner appeared first on 24ora - Prome Den Noticia.