Oposicion y coalicion ta contradeci otro riba tema di KIA su necesidadnan

E reunion den parlamento, e di dos dia, unda cu a trata e tema di KIA, of e prizon nobo pa Aruba, tabata un show unda coalicion ta den su mayoria tabata defende e minister of su plannan mientras cu oposicion tabata den atake. Aunke cu e mesun Minister di Husticia mr. drs. Arthur Dowers na cierto momento a gradici Edgard Vrolijk, kende a elogia parti di su maneho pa cu e prizon KIA. Den caso di parlamentario di AVP Carlos Bermudez, el a cuestiona e criticanan di MEP bisando cu e murayanan di KIA no a cuminsa cay dia 28 di maart, 2025 ora e gobierno nobo a sinta. E ta haya cu MEP por a haci algo durante e shete aña y mey cu nan a goberna Aruba.  “Nan mester a bringa fuerte e shete aña y mey cu nan a sinta y awe Aruba lo tabatin un prizon moderno.” Eduard Pieters a sigura cu e ta den contacto estrecho cu esnan cu ta traha den KIA y ta hustamente nan a expresa preocupacion pa nan bida. Den cuadro di esey mes el a presenta un mocion, cu ta sali na vanguardia di nan. Un di e puntonan cu nan kier mira ta e “Gevarenpremie” pasobra nan ta traha den un ambiente peligroso.   Di otro banda Dangui Oduber a cuestiona e minister, bisando cu den parlamento e ta papia un cos y pafo e ta bisa algo otro. E por corda cu na januari e minister a bisa den parlamento cu e aña’ki lo cuminsa cu e construccion. Pero no ta mira cu a aloca algo pa KIA. Oduber ta sinti cu si e minister ta di  berdad preocupa, e lo mester a cuminsa pa aloca por lo menos algo di e fondo aki pa KIA. Tabatin 2.8 miyon poni p’e murayanan, pero Minister di Finansa Geoffrey Wever a elimina e suma aki. Tur hende sa, e lider di fraccion di AVP Jennifer Arends-Reyes a bisa, cu e solucion pa KIA ta fondo, cu na e momentonan aki no ta disponibel ainda. Den cuadro di esaki, el a critica e posicion di MEP den reunion, kende hustamente tabata contra pa lanta e fondo di inversion cu por yuda cu un parti di e trabounan na KIA. E ta cuestiona MEP pasobra nan a bini cu diferente mocion cu tin e aspecto financiero mara na dje y su pregunta nan ta “di unda ta bay saca e placa”.  Te ainda no a trata den parlamento pakico ta bay uza  e Fondo di Inversion. E presupuesto di e Fondo mester bini ainda. Ruthlyn Lindor (FUTURO) tambe a expresa su preocupacion no solamente pa e infrastructura pero tambe pa e personal cu door di escasez di hende, mester traha hopi biaha double shift cera tras di e murayanan di KIA. “Cera henter dia den e prizon, pa e salud mental di e trahadonan tampoco e ta bon.” E ta referi aki na e escasez di personal cu tin. Si Lindor a expresa su preocupacion na minister riba un punto. Pa cuminsa, pa inicia e proyecto ta exigi di gobierno un inversion di 10 miyon dollar (18 miyon florin).  E kier sa si saca e 18 miyon florin di Fondo di Inversion, di unda ta saca e resto di 120 miyon dollar. E ta pidi pa no haci nada pura pa e “sopi no sali salo”. Mester tin e plan financiero y e fondo cla pa por cuminsa construi.   The post Oposicion y coalicion ta contradeci otro riba tema di KIA su necesidadnan appeared first on 24ora - Prome Den Noticia.