Pa fortalece e lasonan cultural cu Aruba: Delegacion di La Guajira a bishita Prome Minister

Riba invitacion di Stichting Rancho un delegacion a bishita Aruba pa participa activamente den e programacion di conmemoracion di Dia di Emancipacion, celebra siman pasa cu riba 1 di juli tambe a keda proclama como dia nacional. Como parti di e bishita aki, Clifford Rosa presidente di Stichting Rancho a presenta famia de Kom, Hiadees de Kom y Anthon De Kom kende ta famia di un heroe nacional na Surnam esta Anton De Kom y awendia ambos descendiente ta biba na La Guajira . Prome Minister mr. Mike Eman a ricibi Maria Isabel Cabarcas Aguilar, directora di Revista SER Caribe y Fundacion InspirARTE Aain. Durante e reunion, e delegacion a entrega na Prome Minister e prome edicion di Revista SER Caribe. Tambe nan a presenta e di dos edicion, cu anteriormente a wordo lansa den formato digital durante e simposio “Brug entre Generacionnan “na Universidad di Aruba. E portada di e ultimo edicion ta dedica na Ramon Todd Dandaré, reconoci como un di e principal guardiannan di nos idioma Papiamento. Ademas, e delegacion a entrega un invitacion oficial na Prome Minister Mike Eman pa participa den e XV Festival Internacional del Bolero, cu lo tuma luga na Riohacha, Colombia, entre 13 y 16 di november 2026. Durante e encuentro tambe a comparti informacion tocante e trabounan cu Stichting Rancho y Fundacion InspirARTE Aain ta realisa pa fortalece integracion cultural, lenguahe, academico, artistico y literario entre Aruba y La Guajira. Tambe a destaca e resultado di Encuentro Caribeño Colombo Neerlandes “Mma Pe’ ipaasu”, iniciativa cu a conmemora 200 aña di relacionnan diplomatico entre Reino Hulandes y Colombia. The post Pa fortalece e lasonan cultural cu Aruba: Delegacion di La Guajira a bishita Prome Minister appeared first on 24ora - Prome Den Noticia.