Fraccion di MEP: Minister Dowers n’e trahadonan di KIA: Mester bida cu e realidad di e situacion di e instituto  

E debate publico den Parlamento tocante e situacion di Korrektie Instituut Aruba (KIA) a mustra dos realidad hopi cla. Di un banda, tin un crisis alarmante den siguridad di e prizon cu mester accion inmediato; di otro banda, tin un plan pa un prizon nobo pa 2028,pero cu ainda no ta converti den decisionnan concreto. Parlamento no ta pidi mas reconocemento di e problemanan; Parlamento ta pidi liderazgo, claridad y un timeline cu pueblo di Aruba por conta riba dje. P’e motibo aki, Fraccion di MEP a presenta dos mocion crucial den sala di Parlamento pa manda e minister encarga bek pa delibera den Conseho di Minister. E meta tabata pa, cu e respaldo necesario, saca e fondonan rekeri y concretisa decisionnan inmediato p’e institucion. Sinembargo, lamentablemente, ningun di e dos mocion aki ta aproba door di Parlamento, locual ta laga e trahadornan sin e solucionnan directo cu nan tin mester e mesun siman aki. Decepcion grandi den Minister Dowers E trahadornan di KIA, kendenan a sigui e reunion publico aki di cerca, a keda sumamente decepciona cu e contesta di Minister Dowers. E minister a declara den Parlamento cu e solucion n’e momentonan aki ta cu “mester biba cu e realidad”, un postura cu a causa indignacion y un desapunto enorme cerca e personal. E trahadornan, cu tabata spera un plan di rescate y solucionnan a corto plaso, no por acepta cu e contesta di e mandatario encarga ta pa simplemente conforma nan mes cu e situacion peligroso di cada dia. Unda e plan di transicion pa 2026, 2027 y 2028 ta? Fraccion di MEP a cuestiona fuertemente e falta di un plan di transicion concreto p’e proximo añanan. Maske Minister Dowers a presenta un plan structural di UNOPS pa un prizon nobo di 119 miyon dollar pa aña 2028, e realidad ta cu Aruba ta na mita di aña 2026 caba y nada a concretisa pa frena e crisis actual. Un prizon pa futuro no ta brinda proteccio n’e personal cu ta subi warda awe: un estudio no ta tapa e buraconan den muraya, un vision a largo plaso no ta reemplasa un scanner cu falta, y un plan pa mañan no ta duna e departamento di K9 e auto cu nan tin mester awe pa haci nan trabou. E condicionnan di trabou deplorabel E denuncianan di e trahadornan di KIA tocante e murayanan deteriora, e areanan structuralmente debil cu ta tapa cu plywood, falta di personal y scarcedad den material mester ta atendi urgentemente. E minister tin e deber di trece solucionnan inmediato y no por uza e pasado como refugio den Parlamento. Un gobierno no ta scogi pa splica kico otronan no a haci den e ultimo shete aña, sino pa resolve e crisisnan cu tin awo!  Cuestionamiento serio riba Good Governance The post Fraccion di MEP: Minister Dowers n’e trahadonan di KIA: Mester bida cu e realidad di e situacion di e instituto   appeared first on 24ora - Prome Den Noticia.