Fraccion di AVP: Tecnologia mester fortalece dignidad humano y e bienestar comun

Fraccion AVP a participa cu interes den un lectura special presenta pa Arsobispo Charles Jason Gordon na Cas Veneranda, caminda lidernan religioso y representante di diferente sector di comunidad a reuni pa reflexiona riba implicacion moral y etico di Inteligencia Artificial (AI) y otro desaroyo tecnologico den sociedad. Segun Fraccion AVP, e encuentro a ofrece un espacio valioso pa analisa con tecnologia por sigui impulsa progreso, sin perde di bista cu dignidad humano, e bienestar comun y e balornan fundamental di nos sociedad mester keda na centro di tur desaroyo. Den un mundo caminda innovacion tecnologico ta avansa cu gran velocidad, AVP ta considera cu decisionnan tocante digitalisacion y Inteligencia Artificial no por ta basa solamente riba eficiencia of beneficio economico. Tambe mester evalua e impacto cu nan tin riba hende, famia y comunidad. Durante e presentacion, a reflexiona riba e enseñansa historico di e enciclica Rerum Novarum di Papa Leo XIII, cu na su momento a responde na e cambionan profundo cu Revolucion Industrial a trece. Aunke e epoca ey a produci gran progreso economico, tambe a pone na cla e riesgo di permiti innovacion avansa sin suficiente atencion pa dignidad di e ser humano. Condicionnan laboral inhumano, explotacion y trabou infantil a bira ehempel di con progreso sin un fundeshi etico por crea desigualdad y daño social. Fraccion AVP ta considera cu e enseñansa aki ta keda relevante awe, ora Inteligencia Artificial y otro innovacion ta cambia rapidamente e manera cu nos ta biba, traha y comunica cu otro. Tambe durante e lectura a comparti reflexionnan basa riba e pensamento di filosofo Martin Buber, kende a describi e diferencia entre relacionnan cu ta bira puramente funcional y transaccional, y relacionnan humano autentico construi riba conocemento, respet y aprecio mutuo. Di mesun forma, e filosofia di Emmanuel Levinas a sirbi como recordatorio cu cada persona mester wordo reconoci como un ser humano cu su propio dignidad, aspiracionnan y balor. Pa Fraccion AVP, e concepto di e bienestar comun mester sigui ta un principio guia den formulacion di politica publico y den e manera cu Aruba adopta innovacion tecnologico. Sin un fundeshi moral fuerte, progreso tecnologico no lo por logra su potencial completo ni contribui na un sociedad mas fuerte y inclusivo. Fraccion AVP ta expresa su aprecio pa e iniciativa di Arsobispo Charles Jason Gordon di crea un espacio pa dialogo riba un tema cu cada dia ta bira mas relevante pa Aruba y pa mundo henter. “Tecnologia mester acerca hende, mehora calidad di bida y fortalece nos comunidad. E no mester reemplasa contacto humano ni crea mas desigualdad. Progreso berdadero ta progreso cu ta pone dignidad humano y e bienestar comun na centro di cada decision”, Fraccion AVP a conclui. The post Fraccion di AVP: Tecnologia mester fortalece dignidad humano y e bienestar comun appeared first on 24ora - Prome Den Noticia.