Tatiana Pernia: Cambio di ambiente ta prome paso pa cuminsa rehabilitacion

Tatiana Pernia ta un mama di dos yiu. Su adiccion a cuminsa apenas dos aña pasa ora el a cay pisa den e consumo di crack. E mester a entrega ambos yiu den mannan di su mama pa nan mesun bienestar y futuro. Pasando den un situacion di depresion y escape emocional el a cay den droga segun Tatiana Pernia. Esey a pone cu el a yega te na Corporacion Con Animo. Ora bo ta cay den consumo di droga bo ta perde bo mes, perde bo famia y hasta confiansa di tur hende rond di bo. Na dado momento bo ta cuminsa busca manera di wordo yuda. Tatiana a splica cu si bo no acepta e problema bo no ta haya yudansa caminda e ta awe. Ta un privilegio di t’ey na Corporacion Con Animo segun Tatiana a bisa. Danki na Jean Paul cu tambe a busca su drechi. Mescos su mama cu su tata y famia cu yuda pa e por ta den e centro na Colombia. E tin ocho luna recuperando y ta bayendo super bon. Tur dia e tin contacto cu su mayornan y nan ta contento cu e ta na Colombia rehabilitando. Awe segun Tatiana su mama y tata tin e paz mental cu antes nan no tabata tin ora e tabata usando droga. Pa loke ta su yiunan, nan tambe ta bayendo hopi bon na scol. E yiu grandi a sali miho di klas y e chikito ta bayendo scol basico y tambe ta bayendo bon na scol. Esey tambe ta dun’e como mama e trankilidad y paz mental cu e mester pa sigui padilanti. Tin oportunidad pa nan tur pa tin un comienso nobo. Mester djis acepta e realidad den nan man y mira e futuro. Mas aleu, Tatiana ta kere cu si e por a sali for di droga, otro tambe por. Esnan cu conoce y sa e experiencia cu el a pasa aden no por kere cu e ta awe na Colombia recuperando pero e ta posibel. Acepta e enfermedad aki ta hopi importante. Si bo cambia di ambiente ta un prome paso cu bo ta tuma pa logra na yega na rehabilitacion. The post Tatiana Pernia: Cambio di ambiente ta prome paso pa cuminsa rehabilitacion appeared first on 24ora - Prome Den Noticia.