Prome Minister Mike Eman a ricibi miho graduado di VWO na Colegio Arubano

Prome Minister Mike Eman a ricibi recientemente Evie van der Sloot, e miho graduado di VWO na Colegio Arubano. Durante e encuentro, Prome Minister a felicita Evie pa e resultado extraordinario cu el a logra y a entrega un placa como reconocimento pa su prestacion academico excepcional. Evie a comparti cu e ultimo seis aña di su scol tabata un periodo di hopi dedicacion y esfuerso. Awor cu el a completa VWO cu exito, e ta prepara pa cuminsa un siguiente paso importante den su bida academico. “Awor mi tin plan pa bay Hulanda pa studia medicina”, Evie a conta. Durante e encuentro cu Prome Minister, Evie a papia tambe riba su deseo pa, despues di completa su estudio, bolbe Aruba pa contribui cu su conocemento y experiencia. El a indica cu e kier sigui desaroya su mes durante su estudio y haci trabou boluntario pa amplia su experiencia. “Mi ta spera cu despues mi por bolbe Aruba. Mi kier sigui haya experiencia na diferente hospitalnan y haci trabou boluntario durante mi estudio,” el a bisa. Evie a comparti tambe un mensahe inspirado pa otro hoben cu ta sigui nan estudio. Segun Evie, ta importante pa cada persona pone meta cla y sigui traha duro pa logra nan, sin lubida disfruta di e diferente momento cu bida tin pa ofrece. “Pone bo metanan y sigui traha duro pa yega nan. Pero tambe no lubida disfruta di bida, pasa tempo cu bo amigonan y aprecia con Aruba ta bunita”, Evie a expresa. Prome Minister Mike Eman a felicita Evie pa su dedicacion, disciplina y excelente resultado, y a desea Evie hopi exito den e siguiente etapa di su estudio. El a destaca cu e hobennan manera Evie ta representa e futuro di Aruba y ta un inspiracion pa otro studiante cu ta traha pa alcansa nan meta. The post Prome Minister Mike Eman a ricibi miho graduado di VWO na Colegio Arubano appeared first on 24ora - Prome Den Noticia.