E ‘envelop oranje’ cu ta contene e formulario di declaracion di inkomstenbelasting 2025 lo no sali mas

  E declaracion di aña 2025 lo ta online den e portal BO impuesto – ‘BOi’  ORANJESTAD – Pa aña fiscal 2025, Departamento di Impuesto lo otorga e formulario di declaracion di  inkomstenbelasting den un forma digital via e portal ‘BO impuesto’ (BOi). Esaki ta nifica cu e  contribuyentenan lo no ricibi e formulario den e ‘envelop oranje’ di custumber, den nan postbus. Aki ta sigui  algun informacion importante.   Fecha di otorgamento  E fecha di otorgamento di e formulario no ta stipula oficialmente ainda, pero esaki ta planea pa november  2026. Na momento cu e fecha keda stipula, Departamento di Impuesto lo anuncia e fecha oficial di  otorgamento.   Formato diferente  E formulario di aña 2025 lo ta completamente digital y pues den un formato diferente cu locual e  contribuyentenan ta custuma cu ne. E contribuyente lo bay yena e datonan necesario pa su declaracion  online y upload e documentonan rekeri. Despues di controla e declaracion, ta entreg’e. Unabes cu entrega e  declaracion, e sistema ta registra e fecha di entregamento mesora. Por wak e fecha aki tambe den e portal di  BOi tur momento. Ta importante pa ‘save’ e declaracion digital pa propio administracion.   Account di BOi  Pa por haya acceso na e formulario di declaracion, ta rekeri pa cada contribuyente cu ta registra pa  inkomstenbelasting, tin su mesun account di BOi. Esaki ta conta tambe pa e parehanan casa. Ambos pareha  mester tin nan mesun account di BOi.   Departamento di Impuesto ta pidi e personanan cu ainda no tin un account, pa registra mas pronto posibel pa asina evita e presion di ultimo ora.   Persona autorisa  E persona cu ta desea pa un otro persona of accountant yena su declaracion p’e, lo mester autorisa e tercera persona aki via su BOi-portal. Solamente asina, e tercera persona ta haya acceso na e declaracion di  su cliente.  Prepara documento  Apesar cu e formulario di declaracion digital no ta disponibel ainda, Departamento di Impuesto ta recomenda  su contribuyentenan pa cuminsa prepara e documentonan necesario relaciona cu entrada y gasto di aña  2025 por ehempel: salario anual, pensioen di trabou, pensioen di biehes, pensioen di viudo of huerfano,  entrada di huur di propiedad, entrada di ‘side-jobs’, carta di interes di banco y/of otro instancia, seguro di  bida, comprobante di donacionnan haci, comprobante di gastonan di scol di yiu cu ta studia den exterior etc.  E contribuyentenan cu tin un empresa propio (eenmanszaak), tambe mester prepara nan relato anual di aña  2025. Den caso cu e contribuyente mes no por traha e relato anual aki, ta recomendabel pa busca un  consehero fiscal cu conocemento adecua di e materia di impuesto.  Tur documento rekeri pa e declaracion ta keda mescos. E cambio grandi ta cu mester digitalisa e  documentonan. Esaki ta nifica cu mester saca potret of scan e documentonan den formato PDF, pa despues  por upload nan den e portal.  Actualmente e ekipo di Departamento di Impuesto cu ta encarga cu e proyecto ‘IB-online’ ta trahando duro  pa finalisa e declaracion digital e aña aki. Den transcurso di aña, Departamento di Impuesto lo brinda mas  informacion tocante e declaracion di inkomstenbelasting di aña 2025.  Pues, ta importante pa un y tur ta na altura, cu e ‘envelop oranje’ cu nos tur conoce, lo no yega cas mas.   Gerencia di Departamento di Impuesto  15 di juli 2026 The post E ‘envelop oranje’ cu ta contene e formulario di declaracion di inkomstenbelasting 2025 lo no sali mas appeared first on Aruba Native.