La Quinta Beach Resort y Arubalife Organics ta lansa colaboracion local

Forma aliansa significativo cu nos comunidad ta un parti central di e compromiso di La Quinta Beach Resort pa promove turismo responsabel. Esaki a keda refleha un biaha mas durante e ultimo Eagle’s Nest Gathering, unda miembronan, huespednan, partnernan y empleadonan a reuni pa celebra entrepreneurship local y sostenibilidad. E anochi a conta cu Julienne Heronimo, fundado di Arubalife Organics, kende a comparti e historia tras di su marca local y e importancia di scoge pa productonan natural y traha na Aruba. E evento tambe a marca e lansamento di La Quinta Organic Lip Balm, desaroya exclusivamente pa La Quinta y produci na Aruba cu ingredientenan natural pa yuda proteha y hidrata lip mientras ta disfrutando di lama, solo y e biento di nos isla. E colaboracion ta refleha un compromiso pa sostene economia local di Aruba, mientras cu ta ofrece bishitantenan un producto autentico cu a wordo produci na Aruba. La Quinta Organic Lip Balm ta disponibel na Reception Desk di e resort. “Un di e metanan di La Quinta su Eagle’s Nest Gathering ta pa trece nos bishitantenan mas cerca di e comunidad Arubiano,” asina Ursell Arends, Director di Operacion di La Quinta Beach Resort, a menciona. “Door di crea oportunidad pa conecta cu negoshinan local, organisacionnan y fundacionnan, nos ta spera cu nos miembronan y bishitantenan experiencia hopi mas cu djis Aruba su playanan tan admira. Nos kier pa nan conoce e hendenan, e historianan y e iniciativanan cu ta yuda forma un isla mas sostenibel. Door di fortalece e relacionnan aki, nos por contribui na un sector turistico cu no solamente ta balora Aruba su solo, santo blanco y lama blauw, sino tambe e hendenan y organisacionnan cu ta traha tur dia pa proteha nos medio ambiente.” E Eagle’s Nest Gatherings ta sigui sirbi como un plataforma unda organisacionnan local, negoshi y lidernan di cambio por comparti nan trabou, mientras cu nan ta inspira combersacionnan significativo tocante sostenibilidad y compromiso cu nos comunidad. La Quinta, pa varios decada caba ta kere cu crea un experiencia berdaderamente relaha ta bay mas aya cu simplemente ofrece un luga pa keda. E ta nifica yuda nos miembronan y bishitantenan conecta cu Aruba di un forma mas profundo, cu su hende, su naturalesa, su cultura  e organisacionnan local cu ta haci nos isla asina special. The post La Quinta Beach Resort y Arubalife Organics ta lansa colaboracion local appeared first on 24ora - Prome Den Noticia.